د پاکستان د جیو نیوز ټلویزیون خپرونې د ۱۵ ورځو لپاره وځنډول شوې
د پاکستان د رسنیو د محتوا د څار ادارې ویلي، «جیو نیوز» د جون په ۲۶مه د محرم په مناسبت په یوه خپرونه کې داسي «مذهبي انځوریز مواد» خپاره کړي، چې د ادارې په وینا، د خلکو مذهبي احساسات زیانمنولی او مذهبي یووالی کمزوری کولای شي. له همدې امله یاد ټلویزیون د ۱۵ ورځو لپاره تړل شوی.
«جیو نیوز» بښنه غوښتې او د یکشنبې په ورځ یې په یوه اعلامیه کې ویلي، یاد مواد په تېروتنه خپاره شوي او د ټلوېزیون د تحریري تګلارې یا باورونو استازیتوب نه کوي.
په خبرپاڼه کې راغلي چې خپاره شوي انځورونه په عراق او د منځني ختیځ په ځینو سیمو کې د ځینو خلکو مذهبي مراسم ښيي او موخه یې یوازې د سیمه ییزو دودونو ښودل وو، نه د کوم ځانګړي مذهبي نظر ملاتړ.
پاکستان له اوږدې مودې راهیسې د رسنیو د ازادۍ په برخه کې له نیوکو سره مخ دی او ټلوېزیوني شبکې وخت ناوخت له مقرراتي اقداماتو، د خپرونو له ځنډ او د خپراوي له محدودیتونو سره مخ کېږي.
دا په داسی حال کې ده چې د بې پولې خبریالانو سازمان پاکستان د ۲۰۲۶ کال د رسنیو د ازادۍ په نړیوال شاخص کې د ۱۸۰ هېوادونو له ډلې په ۱۵۳م ځای کې ارزولی دی.
