سرچینو افغانستان انټرنشنل- پښتو ته ویلي، پاکستاني جېټ الوتکې پر کونړ، پکتیا او پکتیکا له بریدونو سربېره د ننګرهار پر فضا هم ګرځي. د سرچینو په وینا، د پاکستان دغه جېټ الوتکې ډېرې ټېټې ګرځي او د سیمې اوسېدونکي یې سخت وېرولي دي.
سرچینو زیاته کړې، لا تر اوسه پر ننګرهار د پاکستان د هوايي بمباریو څه راپور نهدی ورکړل شوی، خو ځايي خلک وايي، د تېښتې لاره نهلري، ځکه جېټ الوتکې ډېرې ټيټې ګرځي او د په نښه کېدو وېره ډېره ده.
پاکستان د یکشنبې په نیمه شپه نږدې یوه بجه (د چنګاښ ۷مه) پر کونړ، پکتیا او پکتیکا د بریدونو مسوولیت منلی او ادعا یې کړې، چې په دې بریدونو کې یې ۲۹ وسلهوال وژلي، خو طالبانو لا تر اوسه په دې تړاو څه غبرګون نهدی ښودلی.
د طالبانو او روسیې تر منځ د نظامي- تخنیکي همکاریو له لاسلیک وروسته د طالبانو دفاع وزیر ویلي وو، چې تر دې وروسته پاکستان پر افغانستان د برید جرات نهشي کولی، خو د یادې هوکړې له لاسلیک وروسته دا د پاکستان دویم برید دی چې پر افغانستان یې ترسره کوي.
د طالبانو د دفاع وزیر له ګواښ وروسته پر افغانستان د پاکستان په لومړي برید کې د ذبیحالله مجاهد په وینا، ۱۱ ماشومان، یوه ښځه او یو سپین ږیری وژل شوي او د ښځو او ماشومانو په ګډون ۱۴ نور ټپيان شوي وو.
