د لبنان د روغتیا وزارت اعلان کړی چې د روان میلادي کال د مارچ له دویمې نېټې راهیسې، د اسراییل په بریدونو کې لږ تر لږه ۴ زره او ۲۴۷ کسان وژل شوي دي. د الجزیرې شبکې د راپور له مخې، په دغو بریدونو کې ۱۲ زره او ۱۹۵ نور کسان ټپیان شوي هم دي.
د لبنان د روغتیا وزارت د شمېرو له مخې، د جګړو له بیا پیل راهیسې د هېواد په بېلابېلو سیمو کې د اسراییل هوايي بریدونه دوام لري او د مرګژوبلې شمېر په پرلهپسې ډول لوړېږي.
په همدې حال کې، د ایران د بهرنیو چارو وزیر سید عباس عراقچي له متحده ایالاتو غوښتي چې پر اسراییل فشار راوړي څو پر لبنان خپل بریدونه ودروي او د تهران او واشنګټن ترمنځ د شوې تفاهمنامې اړوند ژمنې په بشپړه توګه عملي کړي.
عراقچي ټینګار کړی چې د دغې تفاهمنامې بشپړ تطبیق، په ځانګړې توګه هغه برخې چې له لبنان سره تړاو لري، د سیمهییز تاوتریخوالي د کمېدو او د ثبات د ټینګښت لپاره مهم ارزښت لري.
دا څرګندونې داسې مهال کېږي چې د اسراییل او لبنان ترمنځ پوځي نښتې لا هم روانې دي او د نړیوالې ټولنې له لوري د جګړې د درولو او د ملکي وګړو د خوندیتوب غوښتنې دوام لري.
