د سعودي عربستان د ارامکو شرکت د چورلکې غورځېدو له امله ۱۴ تنه مړه شوي
د سعودي دولتي خبري اژانس ویلي چې د یکشنبې په ورځ د سعودي د تېلو شرکت ارامکو یوه چورلکه د دغه هېواد په ختیځ ساحلي ښار راس تنوره کې لوېدلې، چې په پایله کې یې ۱۴ کسان مړه شوي دي. یاده پېښه خلیج ته نږدې شوې او تر اوسه د پېښې کره لامل نه دی څرګند شوی.
سعودي دولتي خبري اژانس ویلي چې اړوندو ادارو د پېښې د علت د معلومولو لپاره بشپړه څېړنه پیل کړې ده.
ارامکو شرکت د پېښې په اړه نظر غوښتنې ته سملاسي ځواب نه دی ویلی.
د چارواکو په وینا، دا پېښه د سهار په شاوخوا ۶ بجو (محلي وخت) شوې، خو نور جزئیات نه دي ورکړل شوي.
په همدې حال کې، راپورونه وايي چې ارامکو له پېښې وړاندې له راس تنوره ټرمینل څخه د تیلو بارولو بهیر بیا پیل کړی و، چې نږدې څلور میاشتې وړاندې درول شوی و.
