د چک ولسمشر او لومړی وزیر د ناټو په سرمشریزه کې د پلاوي پر مشرۍ سره جوړ نه دي
د چک جمهوریت حکومت د محکمې د حکم له مخې منلې چې ولسمشر پیټر پاول به راتلونکې اونۍ د ناټو په سرمشریزه کې ګډون وکړي، خو ټینګار یې کړی چې د هېواد د پلاوي مشري به لومړی وزیر اندري بابیش کوي. ټاکل شوې د ناټو سرمشریزه د جولای په ۷ او ۸مه د ترکیې په پلازمېنه انقره کې جوړه شي.
د چک جمهوریت اساسي قانون محکمې تېره اونۍ په یوه لنډمهالي حکم کې ویلي وو چې حکومت باید ولسمشر ته په سرمشریزه کې د ګډون اجازه ورکړي.
ولسمشر پیټر پاول، چې پخوانی جنرال او د ناټو د پوځي کمېټې پخوانی مشر دی، ویلي د هېواد د دود له مخې باید د ناټو په غونډو کې د چک پلاوي مشري ولسمشر وکړي او دی حق لري د مشرانو په رسمي غونډو کې ګډون وکړي.
خو لومړي وزیر اندری بابیش ویلي، د اوکراین او دفاعي لګښتونو په څېر مهمو موضوعاتو کې د ولسمشر او حکومت دریځونه سره توپیر لري، نو ځکه باید د پلاوي مشري حکومت وکړي.
دواړه مشران په ځانګړي ډول د ناټو د دفاعي لګښتونو او له اوکراین سره د مرستو پر سر اختلاف لري.
د بابیش حکومت د دفاعي بودجې له لوړولو ډډه کړې او تمه ده چې سږ کال هم د ناټو هغه هدف پوره نه کړي چې له مخې یې غړي هېوادونه باید د خپل ناخالص کورني تولید لږ تر لږه دوه سلنه پر دفاع ولګوي.
