طالبانو د ټرافیک ریاست نوم د عبور او مرور شرطې په لوی ریاست بدل کړ. د طالبانو د کورنیو چارو وزارت ویاند عبدالمتین قانع تازه د یوې خبرپاڼې په خپرولو سره ویلي، چې د عبور او مرور شرطې لوی ریاست د ترافیکي پېښو د مخنیوي په موخه د یوشمېر نقلیه وسایطو پر تګراتګ محدودیتونه لګولي دي.
په دغه خبرپاڼه کې له ټولو رېکشا چلوونکو او مالکانو غوښتنه شوې، چې د لویو لارو او عامه سړکونو له تګراتګ څخه په جدي توګه ډډه وکړي. همدارنګه د تراکتورونو، ترېشل ماشینونو او نورو هغو وسایطو مالکانو ته هم ویل شوي، که وسایط یې څراغونه، اشارې او نور اړین تجهیزات ونه لري؛ نو باید د شپې لهخوا پر لویو لارو تګراتګ ونه کړي.
په خبرپاڼه کې خبرداری ورکړل شوی، که څوک دغه لارښوونې ونه مني نو د ټرافیک پولیس به له قانون سره سم چلند ورسره وکړي او سرغړونکي به د شکایت حق ونه لري. دا په داسې حال کې ده، چې په دې وروستیو کې په افغانستان کې د ترافیکي پېښو له امله د مرګژوبلې پېښې زیاتې شوې دي. د موټر چلوونکو بېاحتیاطي، د سړکونو خرابوالی او د ترافیکي قوانینو نه مراعاتول د دغه پېښو له مهمو لاملونو ګڼل کېږي.
