د افغانستان د سوداګرۍ او پانګونې خونې رییس سید کریم هاشمي د قرغیزستان د سوداګرۍ او اقتصاد وزارت له مرستیال میدیربیک تومانوف سره په لیدنه کې د دواړو هېوادونو ترمنځ د سوداګریزو اړیکو او د اقتصادي همکاریو د پیاوړتیا په اړه خبرې کړي.
د افغانستان د سوداګرۍ او پانګونې خونې د دوشنبې په ورځ (د چنګاښ ۸مه) د یوې خبرپاڼې په خپرولو سره ویلي، په دې لیدنه کې دواړو لورو د افغانستان او قرغیزستان ترمنځ د سوداګرۍ د کچې د لوړولو لپاره د نویو فرصتونو، د خصوصي سکټور د اړیکو د پراختیا او د ګډو اقتصادي همکاریو د ظرفیت لرونکو برخو د پېژندنې په اړه د نظرونو تبادله کړې ده.
په خبرو کې همداراز د سوداګریزو اسانتیاوو رامنځته کول، د توکو د لېږد او ټرانزیټ ستونزې، د سوداګریزو ویزو اسانتیا او د سوداګریزو اړیکو پر وړاندې د شته خنډونو د لرې کولو موضوعات هم تر بحث لاندې نیول شوي دي.
د سوداګرۍ او پانګونې خونې عمومي رییس سید کریم هاشمي د دواړو هېوادونو ترمنځ د اقتصادي اړیکو پر پراختیا ټینګار کړی او ویلي یې دي، چې افغانستان د خپل جغرافیایي او سټراټیژیک موقعیت له امله کولای شي د منځنۍ او سویلي اسیا د بازارونو په نښلولو کې مهم رول ولوبوي.
نوموړي زیاته کړې، چې د سوداګرۍ، پانګونې، کرنې، صنعت او ګډو اقتصادي پروژو په برخو کې د همکاریو پراختیا د دواړو هېوادونو په ګټه ده.
د قرغیزستان د سوداګرۍ او اقتصاد وزارت مرستیال میدیربیک تومانوف له افغانستان سره د اقتصادي همکاریو د پراختیا هرکلی کړی او ویلي یې دي، چې د سوداګرو او پانګوالو لپاره به د سوداګریزو راکړو ورکړو د زیاتوالي او اړینو اسانتیاوو د برابرولو په برخو کې همکاري وکړي.
د خبرپاڼې له مخې، د لیدنې په پای کې دواړو لورو د خبرو د دوام، د اقتصادي بنسټونو ترمنځ د اړیکو د پیاوړتیا او د افغانستان او قرغیزستان ترمنځ د سوداګریزو همکاریو د پراختیا لپاره د عملي ګامونو پر پورته کولو ټینګار کړی دی.
