د لبنان د پارلمان مشر: له اسراییل سره هوکړه به تصویب او پلي نه‌شي

د بري په مشرۍ د امل غورځنګ له‌خوا خپره شوې اعلامیه کې ویل شوي: «دغه تړون به تصویب نه‌شي او په اوسنۍ بڼه به پلي نه‌شي». په بیان کې راغلي، دا یو «دیکتاتور تړون» دی، نه داسې تړون چې د لبنان حقونه خوندي کړي.
د درېیو هېوادونو په وینا؛ دغه تړون د لبنان او اسراییل ترمنځ د سولې لپاره لاره هواروي. د دوی په وینا؛ له لبنان نه د اسراییل وتل د حزب الله د بې‌وسلې کولو پورې مشروط دي. د نبيه بري دغه دریځ داسې مهال څرګندېږي، چې وړاندې د لبنان حزب الله هر هغه تړون رد کړی چې د دوی بې‌وسلې کول الزامي کوي.
د لبنان اسلامي مقاومت ته نږدې سرچینې ټینګار کوي، چې د اسراییلي ځواکونو هر ډول وتل باید پرته له کوم شرط څخه د ټولو نیول شویو سیمو په اړه د لبنان د حاکمیت بشپړ تضمین سره ترسره شي.
شنونکي په دې باور دي، چې دا بیان د امل غورځنګ او حزب الله ترمنځ بشپړه همغږي ښیي او په عملي توګه د امریکا تر فشار لاندې د تړون پرمختګ لپاره د هرې هڅې لپاره جدي ننګونه ده.
بل لور ته امریکایي او اسراییلي چارواکو دغه تړون د اسراییل د شمالي پولو د ثبات او د ۲۰۲۳کال د اکتوبر د نښتو د تکرار د مخنیوي لپاره یو مهم ګام بللی دی.