وټساپ اعلان کړی، چې ډېر ژر به کاروونکي وکولای شي د خپل ټېلیفون شمېرې پر ځای د «کارننوم» له لارې له نورو سره اړیکه ونیسي. دغه شرکت ویلي، د دې نوې ځانګړنې لپاره د کارننوم د ثبت بهیر له روانې اونۍ پیل شوی او د روان کال په وروستیو کې به په تدریجي ډول ټولو کاروونکو ته وړاندې شي.
وټساپ د دوشنبې په ورځ (د چنګاښ ۸مه) په خپله اېکسپاڼه کې ویلي، چې د ټېلیفون شمېره د هر کاروونکي شخصي معلومات دي او ډېری کسان غواړي له نویو خلکو سره د خپلې شمېرې له شریکولو پرته اړیکه ونیسي. د شرکت په وینا، د همدې اړتیا د پوره کولو لپاره د «کارننوم» ځانګړنه معرفي کېږي.
شرکت ویلي: «له روانې اونۍ څخه کاروونکي کولای شي خپل کارننوم ثبت او خوندي کړي، څو د دې ځانګړنې له رسمي فعالېدو سره یې وکاروي».
د وټساپ د معلوماتو له مخې، کاروونکي باید د اپلېکېشن وروستۍ نسخه ولري او د Settings > Account > Username له لارې خپل کارننوم ثبت کړي. دا بهیر یوازې څو ثانیې وخت نیسي.
وټساپ زیاته کړې، چې د کارننومونو لپاره به عامه لټون یا نوملړ موجود نه وي او هر څوک به یوازې هغه مهال له بل کاروونکي سره اړیکه نیولی شي چې د هغه دقیق کارننوم وپېژني. د شرکت په وینا، دا تګلاره د کاروونکو د محرمیت د لا خوندي کولو لپاره غوره شوې ده.
دغه شرکت همداراز ویلي، چې د نامتو شخصیتونو، بنسټونو او سوداګریزو حسابونو ځینې کارننومونه به له مخکې خوندي شي، څو د هویت د جعل او تقلبي حسابونو مخه ونیول شي. له دې سربېره، د اړتیا په صورت کې کاروونکي کولای شي د خپل کارننوم ترڅنګ یو اختیاري امنیتي کوډ هم وکاروي، څو یوازې هغه کسان ورسره اړیکه ونیسي چې دغه کوډ هم ولري.
وټساپ، چې د مېټا شرکت تر چتر لاندې فعالیت کوي وايي، دا بدلون د محرمیت د پیاوړتیا په موخه ترسره کېږي او له دې وروسته به هغه کسان چې د لومړي ځل لپاره یوه کاروونکي یا سوداګریز حساب ته پیغام استوي، د کارننوم د فعالولو په صورت کې د هغه د ټېلیفون شمېره ونه ویني؛ البته د حساب د جوړولو لپاره به د ټېلیفون شمېره لا هم اړینه وي.
