پزشکیان: ځینې کړۍ د ملي ګټو او مذاکراتو د بهیر د ګډوډولو هڅه کوي
د ایران ولسمشر مسعود پزشکیان ویلي، ځینې اشخاص او سیاسي جریانونه د خنډونو په جوړولو سره د هېواد د ملي ګټو او د مذاکراتو د بهیر د ګډوډولو هڅه کوي. پزشکیان وايي، ځینې کسان د دولت او مرکچي پلاوي پر غړو د «د ولایت ضد»، «دین ضد» او «وطنپلورونکو» په څېر تورونه هم لګوي.
د ایران د ولسمشرۍ ماڼۍ د خبرپاڼې له مخې، پزشکیان دغه څرګندونې په قم ښار کې له شیعه دیني مرجع ایتالله علوي بروجردي سره په لیدنه کې کړې دي.
هغه ویلي، دولت یې هڅه کوي د ډیپلوماسۍ او رغنده نړیوالو اړیکو له لارې د هېواد لاستهراوړنې وساتي، خو ځینې کړۍ د کورني یووالي د کمزوري کولو او د مذاکراتو د بهیر د زیانمنولو هڅه کوي.
د ایران ولسمشر زیاته کړې، ځینې کسان نه یوازې د ملي ګټو د پرمختګ پر وړاندې خنډونه جوړوي، بلکې د دولت او د مرکچي پلاوي پر غړو د «د ولایت ضد»، «د دین ضد» او «وطنپلورونکو» په څېر تورونه هم لګوي.
