د طالبانو د ټولګټو چارو وزارت خبر ورکړی، چې په تېرې غبرګولي میاشت کې د اوسپنې پټلۍ له لارې ۷۹۷زره او ۴۸۲ مټریک ټنه انتقالات شوي دي. د دغه وزارت په وینا؛ یاد انتقالات د حیرتان، اقينې، تورغونډۍ او خواف-هرات بندرونو له لارې شوي دي.
دغه وزارت د سېشنبې په ورځ (د چنګاښ ۹مه) ویلي، چې له دې ډلې د حیرتان بندر له لارې ۵۳۸زره او ۸۸۹ مټریک ټنه، د اقينې بندر له لارې ۷۵زره او ۷۲۲ مټریک ټنه، د تورغونډۍ بندر له لارې ۷۷زره او ۸ مټریک ټنه او د خواف-هرات له لارې ۱۰۵زره او ۸۶۳ مټریک ټنه انتقالات شوي دي.
طالبانو زیاته کړې، له دې ډلې تېره میاشت یوازې ۲زره او ۵۱۷ ټنه صادرات شوي. په انتقالاتو کې ډېره برخه نفتي، غیرنفتي او نور توکي شامل وو. د طالبانو د ټولګټو چارو وزارت د غويي په میاشت کې هم خبر ورکړی و، چې په یوه اونۍ کې د اوسپنې پټلۍ له لارې ۲۳۵زره او ۳۶۲ مټریک ټنه انتقالات شوي وو.
