په جلاوطنۍ کې د افغانستان د خلکو عالي شورا پوځي کمېټې د پاکستان له حکومته غوښتي، چې د افغان کډوالو د جبري اېستلو لړۍ ودروي. یادې شورا ویلي، په دغه کډوالو کې پخواني پوځيان، خبریالان او مدني فعالان شامل دي چې افغانستان ته په ستنېدو سره د مرګ او شکنجې له ګواښ سره مخ کېږي.
دوی له ملګرو ملتونو او نړۍوالې ټولنې هم غوښتي، چې د دغه کسانو دوسیو ته ژر تر ژره رسېدنه وکړي او خوندي هېوادونو ته یې ولېږدوي. د افغانستان د خلکو عالي شورا د بېاسناده افغانانو د اېستلو په اړه د پاکستان د کورنیو چارو وزارت پر وروستۍ پرېکړې اندېښنه څرګنده کړې.
یادې شورا د پاکستان له حکومته او نړۍوالې ټولنې غوښتنه کړې، چې د نړۍوالو حقونو د اصولو او انساني معیارونو په پام کې نیولو سره د کډوالو وضعیت وڅېړي. د دغه کډوالو لویه برخه د ۲۰۲۱کال په اګسټ میاشت کې د جمهوري نظام تر پرځېدو وروسته د خپل ځان او امنیت پر وړاندې د ګواښ له امله د هېواد پرېښودو ته اړه شوې.
د خبرپاڼې له مخې؛ په دغه کسانو کې پخواني پوځيان، د تېر حکومت کارکوونکي، خبریالان، د مدني ټولنې فعالان، ښځې او نجونې شاملې دي چې افغانستان ته د بېرته ستنېدو په صورت کې به د نیول کېدو، شکنجې، لادرکه کېدو او ان د وژنې له جدي ګواښ سره مخ شي.
خبرپاڼه کاږي، چې بهر ته د لېږد لپاره د قانوني بهیر تر بشپړېدو وړاندې د دغه افغانانو جبري اېستل د کډوالو د ملاتړ له اصولو او د جبري ستنولو له اصل سره په ټکر کې دي. یادې شورا دارنګه له ملګرو ملتونو، مرستندویه هېوادونو، د بشري حقونو له بنسټونو او نړۍوالې ټولنې غوښتنه کړې، چې د دغه خوندیتوب لپاره بېړنی اقدام وکړي.
