یو کابل مېشتی: د ودانۍ جوړولو جواز پسې یو کال لالهانده ګرځېدم
یو کابل مېشتي افغانستان انټرنشنل ته په رالېږلي پیغام کې ویلي، چې د ودانۍ جوړولو جواز ترلاسه کولو لپاره یې له یو کال څخه زیات وخت په بېځایه هڅو او ستونزو کې تېر کړی؛ خو لا یې هم هڅې بېپایلې پاتې دي.
دغه کس د نوم نه ښودلو په شرط وایي، د کابل ښاروالۍ له لوري وړاندې اعلان شوی و چې په ناپلان شویو سیمو کې د ودانیزو جوازونو اخیستل اسانه شوي او ګواکې په ۱۵ ورځو کې به جوازونه ورکړل شي؛ خو دغه ژمنه یوازې د خلکو د غولولو یوه خبره وه.
هغه زیاتوي، چې کله د کابل ښاروالۍ اړوندو ناحیو او د اراضي ریاست ته د جواز اخیستو لپاره ورتلو؛ نو له داسې کړنو او خنډونو سره به مخ شو، چې بالاخره پرېکړه یې وکړه له دې پروسې تېر شي. د هغه په خبره؛ حتی په یو کال کې هم یو عادي کس جواز نهشي ترلاسه کولی.
نوموړی ادعا کوي، چې له یو کال هڅو وروسته یې له مجبورۍ دغه کارونه درولي؛ ځکه جواز نه ورکول کېږي، سره له دې چې شاوخوا ۳۰ زره افغانۍ یې د بډې په توګه د اراضۍ ریاست کې ورکړي او له ۳۰زره افغانیو زیاتې نورې پیسې یې د ښاروالۍ کارکوونکو ته هم سپارلي دي.
هغه د کابل د اراضي ریاست، ښاروالۍ او ناحیو کې د فساد او بډې اخیستو ستونزه «جدي او تر ټولو لوړې کچې ته رسېدلې» بولي او وايي، چې دغه وضعیت د خلکو ژوند سخت کړی دی.
د کابل ښار دغه اوسېدونکی زیاتوي، چې خلک د کورونو له نشتوالي سخت ستړي شوي، د کرايي کورونو موندل ستونزمن شوي او کرایې هم خورا لوړې دي. د هغه په وینا؛ خلک نه پوهېږي چې په دغه وضعیت کې څه وکړي او چېرته لاړ شي.
