په عمان کې د طالبانو تر کنټرول لاندې د افغانستان سفارت وایي، د دغه سفارت سرپرست حافظ عمر د عمان د بهرنیو چارو وزارت د کونسلي چارو له رییس محمد بن ناصر المبسلي سره د افغانانو لپاره د عمان د ویزو د ورکړې د بیا پیل په اړه خبرې کړې دي.
د سفارت د معلوماتو له مخې، په دې لیدنه کې حافظ عمر له عماني لوري وغوښتل چې افغانانو ته د ویزو د صادرولو بهیر بېرته پیل کړي.
د امریکا سترې محکمې پرېکړه کړې چې د دغه هېواد ولسمشر ډونالډ ټرمپ کولای شي د اجراییوي څانګې هغه چارواکي له دندو ګوښه کړي چې د ولسمشر له خوا ټاکل شوي وي.
سترې محکمې په هغه قضیه کې چې د فدرالي سوداګرۍ کمېسیون د پخوانۍ غړې ربیکا سلاټر، د ګوښه کېدو په تړاو ثبت شوې وه، په ۶ د ۳ پر وړاندې رایه ورکړه. محکمې وویل، د کمېسیون د غړو د دندې خوندیتوب هغه شرط چې یوازې د ځانګړو دلایلو پر بنسټ یې د ګوښه کولو اجازه ورکوله، د اساسي قانون د واکونو د بېلتون له اصل سره په ټکر کې دی. د محکمې په وینا، هغه چارواکي چې د ولسمشر له خوا ټاکل کېږي، باید ولسمشر ته ځوابویونکي وي او ولسمشر د هغوی د ګوښه کولو واک لري.
ټرمپ د ۲۰۲۵ کال په مارچ کې ربیکا سلاټر له دندې لرې کړې وه او ویلي یې و، د نوموړې پاتې کېدل د ده د ادارې له تګلارو او لومړیتوبونو سره سمون نه لري. سلاټر، چې تر دې وړاندې یې د ډیموکراټ سناتور چک شومر د سلاکارې په توګه هم دنده ترسره کړې وه، د خپلې ګوښه کېدو پر ضد محکمې ته عریضه کړې وه.
بلخوا، سترې محکمې په جلا پرېکړه کې ویلي، ټرمپ نه شي کولای د امریکا فدرالي زېرمه د واليانو د بورډ غړې لېزا کوک له دندې ګوښه کړي، ځکه فدرالي زېرمه د کانګرس له خوا د ځانګړي قانون له مخې جوړه شوې خپلواکه اداره ده او د غړو د لرې کولو لپاره ځانګړی قانوني مېکانېزم لري.
د قطر د بهرنیو چارو وزارت ویاند ویلي، د امریکا ځانګړی استازی سټیو وېټکاف او د ولسمشر ډونالډ ټرمپ زوم جېرېډ کوشنر به دوحې ته ولاړ شي، څو له قطري منځګړو سره د امریکا او ایران د خبرو په اړه سلا مشورې وکړي. هغه زیاته کړې د واشنګټن او تهران ترمنځ به د لوړې کچې کومه لیدنه ترسره نه شي.
ماجد الانصاري د سېشنبې په ورځ یوې خبري ناستې ته وویل، د واشنګټن او تهران ترمنځ به د لوړې کچې کومه لیدنه ترسره نه شي.
نوموړي زیاته کړه، قطر تهران ته د ایران د کنګل شویو شپږو میلیاردو ډالرو پیسې نه دي لېږدولې.
د قطر د بهرنیو چارو وزارت ویاند همداراز وویل، دوحه له عمان سره، چې د هرمز تنګي په لوېدیځ ساحل کې موقعیت لري، د بېړیو د خوندي تګ راتګ په اړه همغږي کوي.
دا څرګندونې داسې مهال کېږي، چې د ایران د بهرنیو چارو وزارت ویاند اسماعیل بقايي هم ویلي، تهران په راتلونکو ورځو کې له امریکايي لوري سره په هېڅ کچه د لیدنې پلان نه لري.
د ایران د بهرنیو چارو وزارت ویاند اسماعیل بقايي وايي، تهران په راتلونکو ورځو کې له امریکايي لوري سره په هېڅ کچه د لیدنې پلان نه لري. بقايي د سېشنبې په ورځ په یوې خبري غونډه کې وویل، چې په لبنان کې د جګړې پای ته رسول د امریکا ژمنه ده او واشنګټن باید اسراییل هم دې کار ته اړ کړي.
هغه زیاته کړه، ایران د امریکايي لوري سره د راتلونکو ورځو لپاره د خبرو یا لیدنې کوم پروګرام نه لري.
د ایران د بهرنیو چارو وزارت ویاند همداراز وویل، د چهارشنبې په ورځ به په دوحه کې له قطري چارواکو سره د تفاهملیک د مادو او د کنګل شویو شتمنیو د ازادېدو په اړه غونډه ولري.
بقايي په دې اړه نور جزییات ورنه کړل.
د بلوچستان په مرکز کوټه کې د بلوڅ یووالي کمېټې د مشرې ماهرنګ بلوڅ او صبغتالله شاه بلوڅ ته د عمري بند سزا پر ضد د اعتراضونو پر دوام پولیسو د احتجاج پرمهال یوشمېر نور معترضان هم نیولي دي.
د معترضانو د کورنیو په وینا؛ ټاکل شوې وه چې د برما هوټل په سیمه سریاب کې سولهییز احتجاج ترسره شي، خو د اعتراض له پیلېدو مخکې پولیس او امنیتي ځواکونه سیمې ته رسېدلي وو.
د دوی په خبره؛ د احتجاج له پیل سره سم امنیتي ځواکونو د معترضانو د خورولو هڅه وکړه او له دې سره سم یوشمېر د بلوڅ یووالي کمیټې غړي يې ونيول. تر نیولو وروسته معترضانو د بشیر څلور لاره وتړله او خپل احتجاجي پرلت يې پیل کړ.
هغوی ویلي، تر هغه چې ټول نیول شوي کسان خوشې نهشي پرلت به دوام ولري. معترضانو د کوټې له اوسېدونکو، د بشري حقونو له بنسټونو، وکیلانو، سیاسي فعالانو او مدني ټولنې غوښتي، چې له دوی سره یوځای شي او د عدالت، اساسي حقونو او د قانون حاکمیت ملاتړ وکړي.
د یادونې وړ ده، چې د روانې اوونۍ د یکشنبې په ورځ نادیه بلوڅ او یوشمېر نورو سیاسي فعالانو د کوټې پرېس کلب مخې ته د ورکو کسانو په احتجاجي کمپ کې یوه مطبوعاتي غونډه وکړه.
د غونډې پرمهال ناديه بلوڅ د ماهرنګ بلوڅ او صبغتالله شاه بلوڅ د عمري بند سزا د عدالت له بنسټیزو اصولو سره په ټکر کې وبلله او ادعا یې وکړه، چې بلوچستان کې د سیاسي فعالانو، د بشري حقونو د مدافعینو او نیوکه کوونکو غږونو د ځپلو لپاره منظمه تګلاره روانه ده.
د همدې خبري غونډې له پای ته رسېدو وروسته پولیسو د پښتون ژغورنې غورځنګ د مرکزي کمېټې غړی زبیر شاه اغا هم ونيوه او نامعلوم ځای ته یې ولېږداوه.
سياېناېن خبري شبکې د دوو لوړپوړو امريکايي سرچينو په حواله راپور ورکړی، چې د امريکا د ولسمشر ډونالډ ټرمپ ځانګړی استازی سټيو وېټکاف له ايراني استازو سره د خبرو لپاره د قطر پلازمېنې دوحې ته تللی دی.
د راپور له مخې؛ د ايران د بهرنيو چارو وزارت مرستيال کاظم غريبابادي ويلي، د ايران د کارپوهانو يو پلاوی هم دوحې ته ځي او ټاکل شوې ده چې هلته د دوو ورځو لپاره پاتې شي. هغه ټينګار کړی، چې د ايراني پلاوي غړي به له امريکايي استازو سره ليدنه ونه کړي.
د امريکا ولسمشر ډونالډ ټرمپ دوشنبې (د چنګاښ ۸مه) پر «ټروت سوشال» خواله رسنۍ ليکلي: «ايران د غونډې غوښتنه کړې. دغه غونډه به سبا په دوحه کې ترسره شي».
ټرمپ د غونډې د ګډونوالو يا د احتمالي اجنډا په اړه نور جزیيات نهوو ورکړي؛ خو د سپينې ماڼۍ وياندې کارولين ليويټ څو ساعته وروسته د «فاکس اېنډ فرېنډز» په خپرونه کې وويل، چې د ټرمپ ځانګړی استازی سټيو وېټکاف او د امريکا د ولسمشر زوم جرډ کوشنر به په دغه غونډه کې د ګډون لپاره قطر ته ولاړ شي.
سره له دې ايراني چارواکو په راتلونکو ورځو کې د تهران او واشنګټن ترمنځ د هر ډول مستقيمو يا تخنيکي خبرو د ترسره کېدو راپورونه رد کړي. د ايران د بهرنيو چارو وزارت مرستيال او د دغه هېواد مخکښ مرکچي کاظم غريبابادي ويلي، که څه هم له قطر سره سلامشورې، د مقابل لوري د ژمنو د عملي کېدو څار په ګډون خبرې روانې دي؛ خو د ځينو رسنيو هغه راپورونه چې ګواکې په دوحه کې به د تخنيکي کاري ډلو خبرې ترسره شي، ناسم دي.