سیمهییزو سرچینو د دوشنبې په ماښام افغانستان انټرنشنل ته ویلي، د هرات پولې ته څېرمه ایراني پوله ساتو ځواکونو د افغانانو پر یوې ډلې ډزې کړې چې له امله یې یوشمېر افغانانو ته مرګژوبله اوښتې ده.
د قربانیانو کره شمېر لاتراوسه روښانه نهدی؛ خو یوې سرچینې ویلي چې په ډزو کې لږترلږه دوه کسان وژل شوي دي. دغه پېښه د ایران پولې ته نږدې د هرات ولایت د کوهسان ولسوالۍ په کمانه او بنیاد سیمو کې رامنځته شوې ده.
د سرچینو په وینا، دغه کسانو پلان لاره چې په ډلهییزه توګه د ایران خاورې ته ننوځي؛ خو د ایراني پوله ساتو ځواکونو لهخوا په نښه شول. سرچینو ویلي، چې د وژل شویو او ټپیانو کره شمېر لاتراوسه روښانه نهدی او په دې اړه بېلابېل راپورونو ترلاسه شوي دي.
خو سرچینو د ډزو او د یوشمېر افغان کډوالو وژنه تایید کړې ده. یوې سرچینې افغانستان انټرنشنل ته ویلي، لسګونه افغانان چې هڅه یې کوله د کمانه سیمې له لارې د ایران خاورې ته ننوځي د ایراني پوله ساتو ځواکونو لهخوا په نښه شوي.
د سرچینې په وینا؛ د ډزو په پایله کې لږ تر لږه دوه کسان وژل شوي او دوه نور ټپیان دي، چې ټپیان د هرات روغتون ته لېږدول شوي. هغه زیاته کړه، چې د یادې ډلې د نورو کډوالو د برخلیک او وضعیت په اړه لاتراوسه معلومات په لاس کې نهشته، چې د پولې هاغاړې ته د ډزو له امله په نښه شوي دي.
د ایران پوله ساتو ځواکونو وړاندې هم په وار، وار پر هغو افغان کډوالو ډزې کړې دي، چې د ایران خاورې ته د ننوتو هڅه یې کوله. د روان کال د جون په لومړیو کې د حالوش بشري حقونو سازمان اعلان کړی و، چې لږترلږه درې افغان وګړي وروسته له هغې ووژل شول او څلور نور ټپیان شول چې د ایران پوله ساتو د سیستان او بلوچستان په بچهراهي سیمه کې د افغان کډوالو پر یوې ډلې ډزې وکړې.
