د امریکا سترې محکمې د زیږون پر بنسټ تابعیت تایید او د ټرمپ اجراییوي فرمان یې رد کړ
د امریکا سترې محکمې پرېکړه کړې چې هغه ماشومان چې په متحده ایالاتو کې د هغو والدینو څخه زېږېدلي وي چې په غیرقانوني یا موقتي ډول په دغه هېواد کې مېشت دي، د اساسي قانون له مخې د امریکا تابعیت ترلاسه کوي.
محکمې د سې شنبې په ورځ پرېکړه کړې چې د اساسي قانون د څوارلسم تعدیل د تابعیت ماده پر دغو ماشومانو هم پلي کېږي او هغوی د زېږېدو له ورځې د امریکا اتباع ګڼل کېږي.
دا قضیه د ولسمشر ډونالډ ټرمپ د ۲۰۲۵ کال د جنورۍ په ۲۰مه د صادر شوي اجراییوي فرمان په تړاو وه. په دغه فرمان کې ویل شوي و چې هغه ماشومان چې په امریکا کې د غیرقانوني یا موقتي مېشتو والدینو څخه زېږېدلي وي، د امریکا د تابعیت مستحق نه دي.
یو شمېر والدینو د دغه فرمان پر ضد دعوه کړې وه او استدلال یې کاوه چې دا اقدام د اساسي قانون له څوارلسم تعدیل او د تابعیت او کډوالۍ له قانون سره په ټکر کې دی. یوې فدرالي محکمې د فرمان د عملي کېدو مخه نیولې وه او وروسته سترې محکمې د قضیې اورېدنه ومنله.
سترې محکمې په خپله پرېکړه کې ویلي چې د څوارلسم تعدیل تاریخي شالید او حقوقي تفسیر څرګندوي، هغه ماشومان چې په امریکا کې زېږېدلي او د امریکا د قضایي صلاحیت تابع وي، د زېږېدو له ورځې د امریکا تابعیت لري. محکمې په دې توګه د ټرمپ هغه اجراییوي فرمان له اساسي قانون سره په ټکر کې وباله چې د دغو ماشومانو د تابعیت د محدودولو هڅه یې کوله.
