له امنیتي ګواښونو سره، سره د هرمز تنګي له لارې د کښتیو تګراتګ دوام لري
د بېړیو څار نړۍوال شرکت مارین ټرافیک ویلي، سره له دې چې امنیتي اندېښنې لاهم پرځای دي او د جمعې او شنبې په ورځو پر دوو کښتیو بریدونه شوي؛ د هرمز تنګي له لارې د کښتیو تګراتګ لاهم دوام لري.
دغه شرکت ویلي، په تېرو درېیو ورځو کې د هرمز تنګي له لارې د ۱۰۸ کښتیو تېرېدل ثبت او تایید شوي دي. د راپور له مخې؛ د جون په ۲۶مه تر ټولو ډېر تګراتګ ثبت شوی، چې ۴۸ بېړۍ ترې تېرې شوې دي. ورپسې د جون په ۲۷مه ۳۸ او د جون په ۲۸مه ۲۲ کښتۍ له دغه تنګي تېرې شوې دي.
د مارین ټرافیک د معلوماتو له مخې؛ دغه شمېرې د وروستیو بریدونو وړاندې مودې پرتله د تګراتګ کمښت ښیي. د یاد شرکت د معلوماتو له مخې؛ د پنجشنبې په ورځ د ۵۴ او د چهارشنبې په ورځ د ۷۰ کښتیو تېرېدل ثبت شوي وو.
د چهارشنبې په ورځ د امریکا او اسراییل لهخوا پر ایران د جګړې له پیل راهیسې د کښتیو د تګراتګ تر ټولو لوړه کچه ثبت شوې ده. د دغه نښتو له پیل وړاندې هره ورځ په منځني ډول شاوخوا ۱۳۰ تر ۱۴۰ کښتۍ د هرمز له تنګي له لارې تېرېدې.
