د سرپل یو اوسېدونکي افغانستان انټرنشنل ته ویلي، د دغه ولایت ډېرې سیمې او خلک د اوبو له سخت کمښت سره مخ دي. نوموړي د اوبو کمښت لاملونه په ځينو سیمو کې په خپلسرې توګه د خلکو لهخوا د څاه ګانو کېندل، اوږدمهاله وچکالي، د بارانونو نشتوالی او له اوبو سره نه احتیاط یاد کړي.
دغه اوسېدونکي دارنګه د ځمکې لاندې اوبو د کمښت په اړه ویلي، چې د سرپل په ډېرو سیمو کې خلک په خپلسري ډول ژورې څاګانې کېندي او بیا د برمو په زور په لویه اندازه اوبه ضایع کوي.
نوموړي په دې اړه ویلي: «یو لامل د ژورو څاهګانو بېشمېره کېندل دي. د بېلګې په توګه په یوه کلي کې چې شاوخوا ۷۰ کورنۍ ژوند کوي، له ۷۵ څخه زیاتې ژورې څاهګانې کېندل شوې دي. د دغه څاهګانو ډېری یې په ځواکمنو یو انچه او دوه انچه پمپونو سمبالې دي او په دوامداره توګه ترې اوبه اېستل کېږي، چې له امله یې د ځمکې لاندې د اوبو کچه په چټکۍ راټیټه شوې ده».
د اوبو د کمښت له کبله ډېرې کورنۍ اړې دي، چې د څښاک اوبو برابرولو لپاره اږده واټنونه ووهي. د سرپل دغه اوسېدونکي له خلکو، ځایي مسوولینو او اړوندو ادارو غوښتي، چې ژر تر ژر دې د ژورو څاه ګانو د کېندنې مخنیوی وکړي؛ څو د یادې ستونزې د پراخېدو مخه ونیول شي.
