د طالبانو د ترانسپورټ او هوايي چلند وزارت د هوا پوهنې ادارې ویلي، چې د پنجشنبې په ورځ (د چنګاښ ۱۱مه) د هېواد په ۱۶ ولایتونو کې د سختو بارانونو، تالندې او برېښنا، ناڅاپي سېلابونو او تېزو بادونو اټکل شوی دی.
د یاد وزارت د خبرپاڼې له مخې، په بدخشان، نورستان، کونړ، لغمان، ننګرهار، لوګر، پکتیا، خوست، پکتیکا، غزني، میدانوردګ، کابل، پروان، کاپیسا، پنجشېر او بغلان ولایتونو کې د سختو ورښتونو او د ناڅاپي سېلابونو د راوتلو احتمال شته.
د خبرپاڼې له مخې، په یادو ولایتونو کې د باران اندازه له ۱۰ څخه تر ۳۵ مليمترو پورې اټکل شوې ده.
د هوا پوهنې ادارې همدارنګه خبرداری ورکړی چې په شمالي، لوېدیځو، سوېلي، سوېلختیځو، ختیځو او مرکزي ولایتونو کې به تېز بادونه، د خاورو او دوړو توپانونه هم رامنځته شي.
د یادېادارې د اټکل له مخې، د باد چټکتیا به په بېلابېلو سیمو کې په ساعت کې له ۵۰ څخه تر ۱۰۰ کیلومترو پورې ورسېږي.
د هوا پوهنې ادارې له اوسېدونکو، په ځانګړي ډول د سېلابځپلو او غرنیو سیمو له خلکو غوښتي چې د احتمالي سېلابونو، تېزو بادونو او نورو طبیعي پېښو پر وړاندې لازم احتیاطي تدابیر ونیسي.
