د ننګرهار ولایت په مرکز جلالاباد ښار کې د طالبانو امنیه قوماندانۍ اعلان کړی چې د دغه ښار د نهمې امنیتي حوزې پولیسو یو تن د دوو کرولا ډوله موټرونو د غلا په تور نیولی دی. له دې سره هممهاله په دغه ولایت کې خلکو له خوا د جنایي پېښو او وسلهوالو غلاوو څخه شکایتونه ډیر شوي دي.
د ننګرهار د امنیه قومندانۍ ویاند سید طیب حماد وویل چې دغه تورن کس د کشفي معلوماتو پر بنسټ د کابل کمپ په سیمه کې نیول شوی دی.
د امنیه قومندانۍ د ویاند د څرګندونو له مخې، نیول شوي کس د پولیسو د لومړنیو څېړنو پر مهال پر خپل جرم اعتراف کړی دی. د طالبانو امنیتي مسوولینو ویلي چې دغه کس په سیمه کې د موټرونو په غلا کولو کې لاس درلود او د کشفي ارګانونو تر تعقیب لاندې و.
سید طیب حماد زیاته کړه چې د نیول شوي کس دوسیه به د لومړنیو څېړنو او قانوني پړاوونو له بشپړېدو وروسته ډېر ژر د دوی اړوندو عدلي او قضایي ارګانونو ته وسپارل شي. د چارواکو په وینا، د دغه کس دوسیه به په شفافه توګه وڅېړل شي.
د ننګرهار امنیه قومندانۍ په خپل بیان کې ټینګار کړی چې په جلالاباد ښار او اړوندو سیمو کې به د غلاوو، جنايي جرمونو او نورو ناقانونه فعالیتونو پر وړاندې کشفي او امنیتي اقدامات لا پیاوړي کړي. دغې قومندانۍ زیاته کړې چې د خلکو د سر او مال د خوندیتوب لپاره به له قانون څخه سرغړوونکو سره جدي او قانوني چلند وشي. دوی داسې مهال دغه ادعا کوي چې په جلال اباد ښار او ولسوالیو کې جنایي پېښې تر پخوا ډېرې شوې دي.
همدا راز انسان تښتوونکي هم تر پخوا ډېر فعال شوي او تازه په دغه ولایت کې یو شمېر ماشومان او ان ځنې شتمن کسان تښتول شوې دي.
همدا راز وسلهوالې غلاوې هم د خلکو پر وړاندې یو بل سرخوږی دی چې ننګرهاریان یې په مخنیوي کې طالبان پاتې بولي. ویل کېږي په پراخه کچه بې روزګاري او د کاري فرصتونو د نشتوالي له کبله نه یوازې په ننګرهار بلکې د کابل په شمول د هېواد په ټولو ولایتونو کې جنایي پېښې او غلاوې په بې سارې توګه ډېرې شوې دي.
