زرګونه افغان کډوال چې د اروپايي هېوادونو په ځانګړې توګه د یونان او بلغاریا له لوري یې د پناه غوښتنې رد شوې، لاهم له ناروښانه برخلیک سره مخ دي. له دې ډلې ډېری یې قانوني اسناد نهلري، نه افغانستان ته ستنېدی شي او نه هم په هغه هېوادونو کې چې اوسېږي د دایمي استوګنې حق ترلاسه کولی شي.
د راپور له مخې؛ د دغه کډوالو د ستونزو د حل لپاره اروپايي ټولنې (د جون په ۲۳مه) په بروکسل کې د طالبانو له استازو سره خبرې کړې. په یاده غونډه کې د اروپايي کمېسیون او د ۱۵ غړو هېوادونو استازو ګډون کړی و.
په دغه خبرو کې د هغه افغانانو د بېرته ستنولو موضوع هم مطرح شوې، چې جرمي سابقه لري او دارنګه د هغو پناه غوښتونکو د اېستلو شونتیا هم څېړل شوې چې د پناه غوښتنې یې رد شوې دي.
طالبانو په اروپایي هېوادونو کې د افغانستان کونسلګریو فعالیت د بېرته پیل او د ډیپلوماتیکو اړیکو پراختیا غوښتنه کړې؛ څو د بېرته ستنېدونکو افغانانو د هویت او سفري اسنادو چارې اسانه شي.
د اروپايي ټولنې د شمېرو له مخې؛ یوازې شاوخوا دوه سلنه هغه افغانان چې د اروپا د پرېښودو امر ورته شوی، په عملي ډول افغانستان ته ستانه شوي دي. همداراز افغانان د ۲۰۲۶کال په اپرېل میاشت کې په اروپايي ټولنه کې د پناه غوښتنې تر ټولو لویه ډله وه.
د بروکسل یاده غونډه د اروپايي پارلمان د یوشمېر غړو او د بشري حقونو د سازمانونو له سختو نیوکو سره مخ شوې ده. نیوکه کوونکي وایي، له طالبانو سره دغه ډول اړیکې د داسې ډلې مشروعیت پیاوړی کوي چې د ښځو او نجونو بنسټیز حقونه یې محدود کړي دي.
د راپور له مخې؛ د اروپايي ټولنې د عدالت محکمې مخکې پرېکړه کړې، چې په افغانستان کې د ښځو پر وړاندې سیستماتیک تبعیض روان دی؛ نو له همدې امله افغان ښځې په اتومات ډول د کډوالۍ خوندیتوب مستحقې ګڼل کېږي او د بېرته ستنولو په پرېکړو کې نه شاملېږي.
