د ننګرهار یو شمېر موټرچلوونکو افغانستان انټرنشنل - پښتو ته ویلي، چې په وروستیو ورځو کې د تېلو بیه په ناڅاپي ډول لوړه شوې او د هر لېټر په نرخ کې ۹ افغانۍ زیاتوالی راغلی دی. د دوی په وینا، مخکې یو لېټر تېل په ۶۷ افغانۍ پلورل کېدل، خو اوس یې بیه ۷۶ افغانیو ته رسېدلې ده.
موټرچلوونکي وایي، د تېلو د بیې دغه لوړوالی د دوی پر ورځني عاید او اقتصادي وضعیت مستقیم اغېز کړی او که نرخونه همداسې لوړ پاتې شي، د خپلو کورنیو لومړنۍ اړتیاوې به هم په سختۍ پوره کړای شي.
دوی له طالبانو او اړوندو ادارو غواړي، چې د تېلو د بیو د کنټرول لپاره عملي ګامونه پورته کړي او د بازار د نرخونو د لوړېدو مخه ونیسي.
د یادونې وړ ده چې دا له ننګرهار څخه د یو شمېرو موټرچلوونکو روایت دی، افغانستان انټرنشنل پښتو یې په خپلواکه توګه نه تاییدوي.
