د امریکا مرستیال ولسمشر جيډي وېنس ویلي چې متحده ایالات له ایران سره په روانو خبرو اترو کې «ټولې برلاسۍ وسیلې» په واک کې لري او د ډونالډ ټرمپ اداره، که ډیپلوماسي بریالۍ شي او که ناکامه، ځان په یوه «ګټونکي» دریځ کې ویني.
وېنس له فاکس نیوز سره په مرکه کې وویل، امریکا دا مهال په «ډېر پیاوړي» موقف کې ده او د واشنګټن دریځ د تهران په پرتله پیاوړی دی.
هغه زیاته کړه، که خبرې اترې بریالۍ شي، چې د امریکا هیله هم همدا ده، نو ایران به د تل لپاره بدل شوی هېواد وي، د ترهګرۍ او سیمهییزې بېثباتۍ له ملاتړ څخه به لاس واخلي، د اټومي وسلو هر ډول هیلې به پرېږدي او بېرته به د نړیوال اقتصاد برخه شي.
د امریکا مرستیال ولسمشر خبرداری ورکړ چې که ایراني چارواکي د واشنګټن غوښتنو ته مثبت ځواب ور نه کړي، نو د ایران اټومي پروګرام به لا هم له منځه یوړل شي، د دغه هېواد دودیز پوځي ځواک به هم سخت زیان وویني او متحده ایالات به بیا هم د ایران په پرتله په پیاوړي دریځ کې پاتې شي.
د ونس څرګندونې په داسې حال کې کېږي چې د واشنګټن او تهران ترمنځ د خبرو اترو د دوام او د دواړو هېوادونو د اړیکو د راتلونکي په اړه نړیوالې سترګې ور اوښتې دي.
