د ګرمۍ څپې د نه مدیریت له امله د فرانسې زرغون ګوند د حکومت پر ضد د بېباورۍ طرح وړاندې کوي
د فرانسې د زرغون ګوند غړو خبر ورکړی چې د جون میاشتې د سختې ګرمۍ څپې د نه مدیریت له امله به د حکومت پر ضد د بېباورۍ یا عدم اعتماد طرح وړاندې کړي. فرانسه راتلونکې اونۍ د سختې ګرمۍ د درېیمې احتمالي څپې لپاره چمتووالی نیسي.
د فرانسې د حکومت ویاندې مود بریژون د چارشنبې په ورځ وویل، چې د بې باورۍ طرح به خامخا وړاندې شي او دا یې «سیاسي اقدام» وباله.
هغې زیاته کړه، حکومت د روان کړکېچ په مدیریت بوخت دی، خو ځینې سیاسي ځواکونه د بې باورۍ د طرحې په وړاندې کولو سره کړکېچ لا پسې زیاتوي.
د فرانسې ملي شورا کې د زرغون ګوند مشرې سیریل شاتلین ویلي، دا طرح د حکومت د چمتووالي د نشتوالي پر ضد د اعتراض په توګه وړاندې کېږي.
د فرانسې د هواپوهنې ادارې ویلي، که څه هم تودوخه د ریکارډ لوړو کچو څخه راکمه شوې، خو لا هم د هېواد په ډېرو سیمو کې شاوخوا ۳۰ درجې سانتيګراد ده او اټکل کېږي د اونۍ په پای کې بېرته لوړه شي.
د فرانسې د عامې روغتیا ادارې ویلي، د جون له ۲۰مې راهیسې د سختې ګرمۍ له امله لږ تر لږه زر اضافي مړینې ثبت شوې دي او خبرداری یې ورکړی چې ښايي اصلي شمېر تر دې هم لوړ وي.
