محمد باقر قالیباف: ایران د بندیزونو له لغوه کېدو وروسته خپل نفت ۲۰ سلنه په لوړه بیه پلوري
د ایران دپارلمان مشر محمدباقر قالیباف ویلي، د ایران پر تیلو د لګول شویو بندیزونو له موقتي لغوه کېدو وروسته، دغه هېواد خپل نفت ۲۰ سلنه په لوړه بیه پلوري.
قالیباف ویلي، له هغه وخته چې د ایران پر وړاندې سمندري بندیزونه لرې شوي، تر اوسه یې له ۴۰ میلیونو څخه ډېر بېرله نفت صادر کړي دي.
هغه زیاته کړې: «له هغې ورځې چې سمندري محاصره پای ته رسېدلې، تر نن پورې مو له ۴۰ میلیونو ډېر بېرله نفت صادر کړي دي».
تر دې وړاندې د «ټانکر ټرېکرز» د نفتو د لېږد څارونکې ادارې په اېکس خواله رسنۍ کې لیکلي وو چې ایران په تېرو دوو اوونیو کې، د امریکا له لوري د نفتو د محدودیتونو له لرې کېدو وروسته، شاوخوا ۵۰ میلیونه بېرله خام نفت صادر کړي دي.
د دغې ادارې د اټکل له مخې، دا کچه د ۲۰۲۶کال د جون میاشتې لپاره په ورځني ډول شاوخوا یو اعشاریه ۶۶ میلیونه بېرله نفتو صادراتو سره برابره ده.
د ایران د چارواکو دغه څرګندونې داسې مهال کېږي چې د نفتو د صادراتو د زیاتېدو او د نړیوال بازار د بدلونونو په اړه بحثونه لا هم دوام لري.
