مای ساتو: د تهران او واشنګټن په خبرو کې د ایران خلک له پامه غورځول شوي
د ایران د بشري حقونو په چارو کې د ملګرو ملتونو ځانګړې راپور ورکوونکې، مای ساتو، ویلي چې د تهران او واشنګټن ترمنځ د کړکېچ د پای ته رسولو لپاره په روانو ډیپلوماټیکو هڅو کې د ایران خلک له پامه غورځول شوي دي.
ساتو له فرانسوي مجلې «لو پوان»سره په مرکه کې ویلي، په داسې حال کې چې د ایران خلک د جګړې او کورني ځپنې دواړو درانه لګښتونه پرې کوي، د دې کړکېچ د حل په هېڅ ډیپلوماټیک بهیر کې ونډه نه لري.
هغې ټینګار کړی چې د ایران ولس د جګړې او سیاسي فشارونو اصلي زیانمن شوی اړخ دی، خو د تهران او واشنګټن د روانو مذاکراتو پر مهال د هغوی غوښتنې او اندېښنې له پامه غورځول کېږي.
د ملګرو ملتونو دغې ځانګړې راپور ورکوونکې دا هم ویلي چې د ایران حکومت تر اوسه دې هېواد ته د هغې د سفر اجازه نه ده ورکړې، څو د بشري حقونو وضعیت له نږدې وڅېړي.
مای ساتو زیاته کړې چې د ایران پر چارواکو دوامدار نړیوال فشار کولای شي «ریښتینې او ملموسې اغېزې» ولري او د بشري حقونو د وضعیت په ښه کېدو کې مرسته وکړي.
د نوموړې څرګندونې داسې مهال کېږي چې د ایران او امریکا ترمنځ د اړیکو د ترینګلتیا د کمولو او د دواړو لورو د اختلافاتو د حل لپاره ډیپلوماټیکې هڅې روانې دي.
