یوشمېر افغان کډوال ادعا کوي، چې افغانستان ته د ستنېدو پر مهال په چمن پنډغالي کې له هغوی څخه په ناقانونه توګه د بډې اخیستو غوښتنه کېږي او که څوک دغه پیسې ورنه کړي؛ نو د بېرته ستنېدو بهیر یې ځنډول کېږي.
د کندهار ولایت د معروف ولسوالۍ اوسېدونکی سلمالله چې له پاکستان نه افغانستان ته ستنېږي وایي، شاوخوا شپږ میاشتې یې په پاکستان کې د کانکېندنې سخت کار کړی؛ خو د بېرته ستنېدو پرمهال ترې پنځه زره پاکستانۍ کلدارې اخیستل شوې دي.
هغه وایي، ډېری افغان کارګر د پاکستان په کانونو کې د کولنګ او بېلچې پرمټ تر سختو شرایطو لاندې کار کوي؛ خو کله چې د بېرته ستنېدو لپاره د چمن پنډغالي ته رسېږي، له هر کس څخه د پنځو، شپږو او ان تر ۸زره پاکستانۍ کلدارو پورې پیسې غوښتل کېږي.
د نوموړي په وینا؛ که څوک دغه پیسې ورنه کړي، د تګ بهیر یې ځنډول کېږي او له ستونزو سره مخ کېږي. تر اوسه پاکستاني چارواکو د دغه ادعاوو په اړه څه نهدي ویلي او په خپلواکه توګه هم د دغه ادعاوو پخلی نهدی شوی.
