د طالبانو د ترانسپورت او هوايي چلند وزارت خبر ورکړی، له سعودي عربستان نه د افغان حاجیانو د بېرته ستنېدو بهیر د چهارشنبې په ورځ (د چنګاښ ۱۰مه) د وروستۍ الوتکې له ستنېدو سره چې ۲۵۲ حاجیان پهکې سپاره وو؛ بشپړ شو.
د یادې ادارې د معلوماتو له مخې؛ له دغه وروستۍ الوتنې سره له سعودي عربستان نه د شاوخوا ۳۰زره افغان حاجیانو د لېږد او بېرته ستنېدو بهیر د کابل په ګډون د هېواد له ټولو هوايي زونونو په بشپړ ډول پای ته ورسېد.
د سږني حج د حاجیانو د لېږد او بېرته ستنېدو بهیر د کابل نړۍوال هوايي ډګر، احمدشاه بابا، خواجه عبدالله انصاري او مولانا جلالالدین محمد بلخي هوايي ډګرونو له لارې ترسره شوی دی.
دغه بهیر (د غبرګولي په ۱۱مه) پیل شوی و او په شاوخوا یوې میاشتې کې بشپړ شو. تر دې وړاندې د اریانا افغان هوايي شرکت ویلي، چې یوازې دغه شرکت د ۱۴۰۵ لمریز کال کې د حاجیانو د لېږد او ستنېدو په ترڅ کې د ۵۴ الوتنو له لارې ۶زره او ۲۱۰ افغان حاجیان سعودي عربستان ته انتقال کړي دي.
د یاد وزارت د معلوماتو له مخې؛ د حاجیانو د لېږد او بېرته ستنېدو بهیر په دوو پړاوونو کې ترسره شوی، په لومړي پړاو کې هغه حاجیان هېواد ته راستانه شول چې د سفر په پیل کې له افغانستان نه مستقیم مدینې منورې ته لېږدول شوي وو او په دویم پړاو کې هغه حاجیان شامل وو چې له بېلابېلو هوايي زونونو د جدې له لارې مکې مکرمې ته تللي وو.
