په باجوړ کې د ناامنۍ او ډرون بریدونو پرضد خلکو د احتجاج په توګه د باجوړ ـ پېښور لاره وتړله
د خیبر پښتونخوا د باجوړ ولسوالۍ د پهاټک څلورلارې سیمه کې ځايي اوسېدونکو د ناامنۍ او د ډرون بریدونو پرضد احتجاج کړی او د باجوړ ـ پېښور لویه لاره یې د هر ډول تګراتګ لپاره تړلې ده.
احتجاح کوونکي وایي، په سیمه کې امنیتي وضعیت خورا کړکېچن شوی او ډرون بریدونو د خلکو اندېښنې زیاتې کړې دي. دوی غوښتنه کړې، چې د ډرون بریدونو په اړه دې خپلواکې، رڼې او بېپرې پلټنې وشي؛ مسوول کسان دې وپېژندل شي او د سیمې د خلکو د سر او مال خونديتوب لپاره دې عملي او اغېزمن ګامونه واخیستل شي.
د احتجاج له امله د لارې دواړه غاړو ته د موټرو اوږده کتارونه جوړ شوي او مساپر، ناروغان، زدهکوونکي او بار وړونکي موټر د څو ساعتونو لپاره پر لویه لار بند پاتې دي. د راپورونو له مخې؛ د ولسوالۍ ادارې او امنیتي چارواکي د احتجاج سیمې ته رسېدلي او له احتجاج کوونکو سره د خبرو له لارې د لارې د بېرته پرانیستو هڅې روانې دي.
