په دایکنډي کې د طالبانو د کور او ښار جوړولو رییس عصمتالله صالحي وایي، چې د ۶۹۲ راستنو شویو کډوالو کورنیو لپاره یې د استوګنیزو نومرو د وېش لړۍ پیل کړې ده. د هغه په وینا؛ د ۱۱زره او ۳۵۹ راستنو شویو کډوالو نوملړ یې ترلاسه کړی، چې له دې ډلې تر ۵زرو د زیاتو کسانو اسناد بشپړ شوي.
هغه وایي، په لومړي پړاو کې د همدغه نوملړ له مخې ۶۹۲ کسانو ته د استوګنیزو نومرو وېش پیل شوی او پاتې وړ کسان به هم د ټاکلي مهالوېش له مخې خپلې نمرې ترلاسه کړي. صالحي زیاته کړې، چې د هرې استوګنیزې نمرې مساحت ۵ بسوې دی.
طالبان همداراز وایي، چې هېواد ته د راستنېدونکو کډوالو د بېرته راتګ بهیر یې په ښه ډول مدیریت کړی دی. دا په داسې حال کې ده، چې د طالبانو د کډوالو او راستنېدونکو چارو وزارت د کډوالو نړۍوالې ورځې په مناسبت ویلي و، چې د روان کال په لومړیو پنځو میاشتو کې ۸۰۲زره او ۷۷۲ افغانان په خپله خوښه او یا هم په جبري توګه افغانستان ته ستانه شوي دي.
سره له دې چې طالبانو افغانستان ته د بېرته ستنېدونکو کډوالو لپاره په ځینو ولایتونو کې د اوسېدو ځانګړي پنډغالي او ښارګوټي جوړ کړي؛ خو تازه ستانه شوي کډوال له بېکارۍ او د سرپناه له نشتوالي شکایت کوي او ځینې کسان هڅه کوي بېرته پر ناقانونه لارو له هېواده ووځي.
