په کندهار کې د طالبانو والي ملا شیرین له دوه کلن ځنډ وروسته د دغه ولایت له سیمهییزو خبریالانو سره ناسته کړې او هغوی ته یې د طالبانو له ادارې سره د وفادارۍ سپارښتنه کړې ده. خبریالانو ته اجازه نه ده ورکړل شوې، چې د ناستې ځای ته له ځان سره ځیرک موبایلونه یوسي.
د کندهار سیمهییز خبریالان وايي، له دوه کلن ځنډ وروسته یې د پنجشنبې په ورځ په کندهار کې د طالبانو له والي ملا شیرین سره کتلي دي.
د کندهار خبریالان وايي، په یاده ناسته کې یې له ملا شیرین سره د ځیرکو موبایلونو پر کارونې د بندیز او معلوماتو ته د نه لاسرسي په اړه خپلې اندېښنې شریکې کړې دي.
یو خبریال چې نه غواړي نوم یې واخېستل شي، افغانستان انټرنشنل ته وویل:«موږ د ځیرکو موبایلونو پر کارونې د بندیز، د دولتي ادارو له لوري له خبریالانوو سره د معلوماتو نه شریکولو، د سیمهییزو رسنیو د مالیاتو او د کندهار د خلکو ځینې ستونزو په اړه، چې موږ پوهېدو غږ یې تر ولایته نه رسیږي، وغږېدو».
خبریالانو د ملا شیرین له قوله ویلي، چې پر ځیرکو موبایلونو بندیز حتمي دی، خو د هغه په وینا، ولایتي اداره هڅه کوي له خبریالانو سره د معلوماتو شریکولو لپاره د یوې بلې نوې بدیلي لارې د ارزونې په اړه ناسته وکړي.
خبریالان وايي، چې د ولایت ودانۍ ته د ننوتلو پرمهال له څو پلټنځایونو تېر شوي او هیچاته د ولایت ودانۍ ته د ځیرک موبایل د وړلو اجازه هم نه ده ورکړل شوې.
کندهار د هغو لومړنیو ولایتونو له ډلې دی، چې طالب چارواکو پر تصویري مرکو پکې بندیز لګولی او د نورو ولایتونو په پرتله طالب چارواکي له خبریالانو سره ډېره کمه همکاري لري.
