د خیبر پښتونخوا په باجوړ کې د ډرون برید له امله درې کسان وژل شوي او اته نور ټپیان دي
د خیبر پښتونخوا د باجوړ ولسوالۍ په شینکوټ سیمه کې تېره شپه یو استوګنیز کور په ډرون برید کې په نښه شوی، چې له امله یې درې کسان وژل شوي او اته نور ټپیان دي. ځایي اوسېدونکي وایي، چې په وژل شویو کسانو کې یوه ماشومه هم شامله ده.
د ځایي اوسېدونکو په وینا؛ په وژل شویو کې ۱۵ کلن اسحاق، ۳۰ کلن امتیاز او پنځه کلنه منیبه شامل دي. دوی زیاته کړې، چې تر پېښې وروسته ټپیان نږدې روغتون ته لېږدول شوي دي.
ځایي اوسېدونکي وایي، له برید وروسته په سیمه کې د وېرې او اندېښنې فضا خوره شوې ده. لاتراوسه کومې ډلې د یاد برید پړه په غاړه نهده اخیستې.
دا په داسې حال کې ده، چې پرون د خیبر پښتونخوا د باجوړ ولسوالۍ د پهاټک څلورلارې سیمه کې ځايي اوسېدونکو د ناامنۍ او د ډرون بریدونو پرضد احتجاج کړی و او د باجوړ ـ پېښور لویه لاره یې د هر ډول تګراتګ لپاره تړلې وه.
احتجاح کوونکو ویلي وو، په سیمه کې امنیتي وضعیت خورا کړکېچن شوی او ډرون بریدونو د خلکو اندېښنې زیاتې کړې دي. دوی غوښتنه کړې وه، چې د ډرون بریدونو په اړه دې خپلواکې، رڼې او بېپرې پلټنې وشي؛ مسوول کسان دې وپېژندل شي او د سیمې د خلکو د سر او مال خونديتوب لپاره دې عملي او اغېزمن ګامونه واخیستل شي.
