په خیبرپښتونخوا او بلوچستان کې د سختو ورښتونو له امله اووه کسان مړه او ۴۶ نور ټپيان دي
په خیبر پښتونخوا او بلوچستان کې موسمي بارانونو، تالندې برېښنا، سېلابونو او د کورونو نړېدو په بېلابېلو پېښو کې لږترلږه اووه کسان مړه او ۴۶ نور ټپیان شوي دي. له دې ډلې د خیبر پښتونخوا په بېلابېلو سیمو کې د بارانونو اړوند پېښو کې څلور کسان مړه او ۳۶ نور ټپیان شوي دي.
د راپورونو له مخې؛ دغه پېښې په بر دېر، خیبر، شانګله، مردان او باجوړ ولسوالیو کې شوې دي. په بر دېر کې د سخت باران پرمهال یوې دیني مدرسې ته نږدې د تندر پرېوتو له امله وېره خپره شوې او د ګډوډۍ په ترڅ کې ۲۱ زدهکوونکې ټپیانې شوې دي. روغتیايي چارواکي وایي، د ټولو ټپیانو روغتیايي وضعیت د ډاډ وړ دی.
په خیبر ولسوالۍ کې بیا د تندر پرېوتو له امله دوه ماشومان مړه او درې نور ټپیان دي. په داسې حال کې چې د شانګلې ولسوالۍ په پوران سیمه کې یوه ښځه د ناڅاپي سېلاب له امله مړه او یوه بله ټپي شوې ده.
بل لور ته د بلوچستان په ژوب ولسوالۍ کې د سختو بارانونو او تیزو بادونو له امله د کورونو نړېدو په درېیو جلا پېښو کې یوه ښځه او دوه ماشومان مړه او ۱۰ نور کسان ټپیان شوي دي. د ژغورنې ادارو ویلي، د نړېدلو کورونو کنډوالو لاندې مړي او ټپیان را اېستل شوي او د ژوب ټراما سنټر ته لېږدول شوي دي. ځایي چارواکي وایي، د ډېرو ټپیانو روغتیايي وضعیت د ډاډ وړ دی او تر درملنې لاندې دي.
