د نېکمرغۍ او برکت په تمه؛ د مکسیکو یوه ښاروال له تمساح سره «واده» کړی
د مکسیکو د سوېلي سان پیدرو هوامیلولا ښار ښاروال ډانیل ګوتیرز د څو پېړۍ پخواني دود د پاللو په موخه له یوې تمساح سره د واده سمبولیک مراسم ترسره کړل. د سیمې خلک د خپلو زړو دودونو له مخې په دې باور دي، چې دا چاره ښار ته سوکالي، برکت او پرېماني راولي.
دغه مراسم د دوشنبې په ورځ، د جون په ۳۰مه، ترسره شول. د رویټرز د راپور له مخې، د سیمې خلک باور لري چې دا دود ښار ته سوکالي، برکت او ښه حاصلات راولي.
په مراسمو کې ښځینه تمساح، چې «انا سنتیا رامیرز» نومول شوې، د ناوې په څېر په سپینو جامو سمبال شوې وه. د ښار اوسېدونکو د دودیزې موسیقۍ او نڅاوو ترڅنګ د دې مراسمو هرکلی کړی.
د راپورونو له مخې، د دې دود مخینه څو پېړۍ پخوانۍ ده او ریښې یې د هسپانویانو له واکمنۍ مخکې د سیمې د بومي قومونو دودونو ته رسېږي.
ځايي خلک ښځینه تمساح د «مور ځمکې» استازې ګڼي او باور لري چې له ښاروال سره یې سمبولیک واده د طبیعت، انسان او ټولنې ترمنځ د همغږۍ نښه ده او د ښار لپاره د نېکمرغۍ، برکت او پراخې روزۍ هیله څرګندوي.
