یو افغان: ایراني ځواکونو یو وار بیا د افغان مساپرو پر کاروان برید کړی
یو افغان افغانستان انټرنشنل ته په لېږلي پیغام کې ویلي، چې ایراني ځواکونو یو وار بیا د افغان مساپرو پر کاروان برید کړی دی. د هغه په وینا، یاد کاروان یوه میاشت وړاندې لادرکه شوی و؛ خو نن روښانه شوه چې دغه ځوانان د ایراني پولیسو لهخوا په ډزو وژل شوي دي.
هغه وایي: «تر لوی اختر وروسته له بېلابېلو ولایتونو څخه د افغان مساپرو یو کاروان چې ایران ته روان وو، هڅه وکړه د نیمروز دیوال له لارې دغه هېواد ته ننوځي. د ایران خاورې ته تر ننوتو وروسته، دغه کاروان په یاد هېواد کې د ایراني پولیسو له ګزمې سره مخ شو».
هغه وایي، یاد کاروان یوه میاشت وړاندې لادرکه شوی و؛ خو نن روښانه شوه چې دغه ځوانان د ایراني پولیسو لهخوا په ډزو وژل شوي او له دې ډلې د یوشمېر کسانو د جسدونو د لېږد هڅې روانې دي.
نوموړي، د دغه کاروان د مساپرو او وژل شویو افغانانو د شمېر په اړه څه نهدي ویلي. تر دې وړاندې سیمهییزو سرچینو د دوشنبې په ماښام افغانستان انټرنشنل ته ویلي و، د هرات پولې ته څېرمه ایراني پوله ساتو ځواکونو د افغانانو پر یوې ډلې ډزې کړې چې له امله یې یوشمېر افغانانو ته مرګژوبله اوښتې ده.
د سرچینو په وینا، د قربانیانو کره شمېر لاتراوسه روښانه نهدی؛ خو د ځینو راپورونو له مخې په ډزو کې لږترلږه دوه کسان وژل شوي دي. دغه پېښه د ایران پولې ته نږدې د هرات ولایت د کوهسان ولسوالۍ په کمانه او بنیاد سیمو کې رامنځته شوې وه.
