د سویلي اسیا د بدن ښکلا سیالۍ؛ افغان ورزشکارانو شپږ مډالونه وګټل
د طالبانو د المپیک، بدني روزنې او سپورټ ریاست اعلان کړی، چې افغان ورزشکارانو د سویلي اسیا د بدن ښکلا په شپاړسم پړاو سیالیو کې شپږ بېلابېل مډالونه ګټلي دي. په دغو مډالونو کې دوه د سرو زرو، درې د سپینو زرو او یو د برونزو مډال شامل دي.
دغه ریاست د پنجشنبې په ورځ (د چنګاښ ۱۱مه) د یوې خبرپاڼې په خپرولو سره وايي، نصیب الله عظیمي په سپورټ فزیک او میوند بابکرخېل په ازاد وزن کې د سرو زرو مډالونه په خپل نوم کړل. دغه راز خواجه رفیع په اتلیتیک فزیک، احمد حبیبي په ۷۵ کیلو ګرامه وزن کې او ریاض الرحمن احسان په ازاد وزن کې د سپینو زرو مډالونه او بلال جلیلي د برونزو مډال ترلاسه کړی دی.
په دغو سیالیو کې د افغانستان په استازولۍ یوې ۱۸ کسیزې لوبډلې ګډون کړی دی. دا سیالۍ د اتو بېلابېلو هېوادونو د ورزشکارانو په ګډون د چنګاښ په ۹مه پیل شوې دي او د روانې میاشتې تر ۱۳مې نېټې پورې به دوام وکړي.
د طالبانو د سپورټي چارو مسوولینو ویلي، چې د هېواد د بدن ښکلا ملي لوبډلې په دغو سیالیو کې د ګډون لپاره پوره چمتووالی نیولی وو. د دوی په وینا، د دغو ورزشکارانو بریا په سیمهییزه کچه د هېواد نوم روښانه کړی او هڅه کېږي، چې د لوبغاړو د لا هڅونې لپاره اسانتیاوې برابرې شي.
د افغانستان د بدن ښکلا فدراسیون د معلوماتو له مخې، ملي لوبغاړو د دغو سیالیو په لومړۍ ورځ هم په ځلېدو سره یو د سرو زرو، دوه د سپینو زرو او یو د برونزو مډال ګټلي وو. یاد فدراسیون د لومړۍ ورځې لاسته راوړنې په دغو سیالیو کې د افغان ورزشکارانو لپاره یو بریالی او هیله بښونکی پیل بللی وو.
