د بغلان اوسېدونکي: له خلکو نه د تذکرو لپاره له ۸۰۰ تر ۱۰۰۰ افغانیو پورې اخیستل کېږي
د بغلان یوشمېر اوسېدونکو افغانستان انټرنشنل ته ویلي، چې د دغه ولایت په خوست ولسوالۍ کې د طالبانو د احصايې مدیر قاري عطاالله خلکو ته جدي ستونزې جوړې کړې او ګڼ کسان ترې شکایتونه کوي. د دوی په خبره؛ هغه د یوې تذکرې جوړولو لپاره له خلکو له ۸۰۰ تر ۱۰۰۰ افغانیو ناقانونه پیسې اخلي.
دغه اوسېدونکي وايي، د تذکرې جوړول او اخیستل د هر افغان قانوني حق دی او ډېری خلک د کمزوري اقتصاد له امله د دومره پېسو د ورکړې وس نهلري. د خلکو په خبره؛ له مراجعینو سره د دغه طالب مسوول چلند هم مناسب نهدی.
خلک ادعا کوي، چې نوموړي له لنډې مودې راهیسې د خپلې دندې پرمهال په یاده ولسوالۍ کې څو استوګنیز کورونه او ګڼه شتمني ترلاسه کړې. خلکو دا هم ویلي، دغه ریاست په تذکرو کې د معلوماتو د ثبت او فورمو ډکولو پرمهال هم پرله پسې تېروتنې کوي چې له امله یې وروسته مراجعین د پاسپورټ جوړولو پرمهال له ستونزو سره مخ وي.
د بغلان اوسېدونکو له افغانستان انټرنشنل نه د دغه خلکو د غږ رسولو او د یادې ستونزې د بېپرې څېړنو غوښتنه کړې ده.
