د لندن یوې محکمې د ایران انټرنشنل د خبریال د چړو وهلو په قضیه کې دوه کسان په بند محکوم کړل
د لندن یوې محکمې دوه رومانیايي وګړي چې د څارنوالانو په وینا د ایران د حکومت په استازیتوب یې فعالیت کاوه، د ایران انټرنشنل ټلویزیون د خبریال د چړو وهلو او قصدي ټپي کولو په جرم په اوږدمهاله بند محکوم کړل.
ایران الاصله بریتانوی خبریال او د ایران انټرنشنل ټلوېزیون کارکوونکی پوریا زراعتي د ۲۰۲۴ کال د مارچ په میاشت کې د لندن په سويل لوېدیځ کې خپل کور ته نږدې درې ځله په پښه په چړه وهل شوی و. پولیسو د قضیې په تړاو دوه رومانیایي وګړي ونیول.
۲۱ کلن ناندیتو بادیا او ۲۵ کلن جورج ستانا د قصدي ټپي کولو تورونه رد کړي وو، خو د لندن د وولویچ کراون محکمې د جون په میاشت کې دواړه مجرم وپېژندل.
د لندن د وولویچ کراون محکمې د جمعې په ورځ ناندیتو بادیا په اته کاله او جورج ستانا په ۱۲ کاله بند محکوم کړل.
څارنوالانو ویلي، دواړو د ایران د حکومت د نیابتي کسانو په توګه عمل کړی، خو د ایران حکومت له مخکې دا تورونه رد کړي دي.
