د ایران د پوځ مشر: د علي خامنهيي د وینې غچ به واخلو
د ایران د پوځ لوی درستیز امیر حاتمي د علي خامنهيي او د هغه د کورنۍ د غړو د جنازي د مراسمو په څنډه کې یې خبرداری ورکړی چې ایران به د «علي خامنهيي د وینې غچ» واخلي.
د ایران د پوځ لوی درستیز د وسلهوالو ځواکونو د لوړپوړو قوماندانانو د حضور پر مهال ویلي، په لا ټینګه اراده خپلو «دښمنانو» ته اعلانوو چې «د علي خامنهيي د وینې غچ به واخلو.»
د علي خامنهيي او د هغه د کورنۍ د غړو د جنازې له مراسمو څخه په خپرو شویو ویډیوګانو کې د سپاه پاسداران لوی درستیز احمد وحیدي نه تر سترګو کېږي.
خو د خاتمالانبیا مرکزي قومندانۍ مشرعلي عبداللهي، د ایران د پولیسو عمومي قوماندان ، د دفاع وزارت سرپرست او د پوځ د لوی درستیز مرستیال او د همغږۍ رییس سمندار حبیبالله سیاري په دغو مراسمو کې ګډون کړی و.
علي خامنهيي د ۱۹۸۹ کال د جون په میاشت کې د ایران د بنسټګر روحالله خمیني تر مړینې وروسته، د دغه هېواد د ستر مذهبي مشر په توګه وټاکل شو او څه باندې درې لسیزې یې د ایران د سیاسي، پوځي او امنیتي پرېکړو مشري وکړه.
علي خامنهيي د ۲۰۲۶ کال د فبرورۍ په ۲۸مه د امریکا او اسراییلو په ګډ هوايي برید کې ووژل شو چې د ایران دولتي رسنیو یې مړینه د ۲۰۲۶ کال د مارچ په لومړۍ نېټه تایید کړه.
