د عراق لومړي وزیر دولتي ادارو ته د فساد د دوسیو د جدي څېړلو امر کړی
د عراق لومړي وزیر علي الزیدي د دغه هېواد له امنیتي چارواکو سره په لیدنه کې پر دولتي ادارو غږ کړی، چې په فساد د تورنو کسانو د نیولو، د عامه شتمنیو د بېرته راګرځولو او له اقتصادي جرمونو سره د مبارزې لپاره همغږي کار وکړي.
علي الزیدي ټینګار وکړ چې د دغې همغږۍ هدف د عامه داراییو خوندیتوب او د قانون ښه پلي کول دي. هغه وویل، د عراق حکومت د فساد په وړاندې د مبارزې او مخنیوي لپاره خپل اصلاحي پروګرام د وزارتي پلان په اډانه کې پر مخ بیايي. د عراق د لومړي وزیر په وینا، ټول هغه کسان چې په فساد تورن دي، باید تعقیب او عدالت ته وسپارل شي او دا لړۍ باید د حکومت ټولې برخې تر پوښښ لاندې راولي.
دا په داسې حال کې ده چې څو ورځې وړاندې د عراق امنیتي ځواکونو د بغداد په شنه سیمه کې په یو لړ شپنیو عملیاتو کې یو شمېر سیاستوال، د پارلمان غړي او دولتي چارواکي د فساد په تور ونیول. د راپورونو له مخې، د نیول شویو کسانو شمېر شاوخوا ۴۷ تنو ته رسېږي او اسوشیټېډ پریس اژانس لیکلي چې په دوی کې ۱۲ تنه یې د پارلمان فعال غړي دي.
د عراق د اصلاحاتو کمېسیون اعلان کړی چې دا نیونې په بغداد کې له دقیقې او دوامدارې څارنې وروسته د یوه پراخ شپني عملیات په ترڅ کې شوې دي. د دغه کمېسیون په وینا، په نیول شویو کسانو کې وکیلان، دولتي چارواکي او عراقي سوداګر شامل دي.
