د سویلي اسیا د بدن ښکلا سیالۍ؛ افغان ورزشکارانو په دغو سیالیو کې درېیم مقام خپل کړ
د طالبانو تر ادارې لاندې د المپیک، بدني روزنې او سپورټ ریاست اعلان کړی، چې افغان ورزشکارانو د سویلي اسیا د بدن ښکلا په شپاړسم پړاو سیالیو کې درېیم مقام خپل کړی دی. دغه سیالۍ د اتو هېوادونو د ورزشکارانو په ګډون د چنګاښ پر ۹مه پیل او د چنګاښ پر ۱۲مه پای ته ورسېدې.
د طالبانو د المپیک، بدني روزنې او سپورټ ریاست د جمعې په ورځ (د چنګاښ ۱۲مه) د یوې خبرپاڼې په خپرولو سره ویلي، په دغو سیالیو کې افغان لوبډلې په ټولیزه توګه لس مډالونه وګټل چې په هغو کې درې یې د سرو زرو، درې یې د سپینو زرو او څلور نور یې د برونزو مډالونه دي.
د سپورټ ریاست د معلوماتو له مخې، په وروستي پړاو کې افغان ورزشکارانو یو د سرو زرو او درې د برونزو مډالونه ترلاسه کړل.
د دې ترڅنګ، دوو افغان ورزشکارانو په دغو سیالیو کې څلورم مقامونه خپل کړي او دوو افغان لوبڅارانو ته د نړیوالې لوبڅارۍ سندونه هم ورکړل شوي دي.
د یادونې وړ ده، چې په دغو سیالیو کې د افغانستان په استازولۍ یوې ۱۸ کسیزې لوبډلې ګډون کړی وو.
