د بلوچستان ګوادر کې د ساحلي ځواکونو پر پوستې په ځانمرګي برید کې ۴ پاکستاني سرتيري وژل شوي

د ګوادر د پولیسو د راپور له مخې، دغه برید د جمعې په ماښام (د چنګاښ ۱۲مه) شاوخوا ۷ بجې جیواني ښار ته نږدې د «پنوان» پر پوستې شوی دی.

د راپور له مخې، دغه پېښه هغه مهال رامنځته شوې چې ځانمرګي بریدګر له چاودېدونکو توکو ډک موټر (مازدا) ته د یادې پوستې ودانۍ ته څېرمه چاودنه ورکړه.

د راپور له مخې، په برید کې د پاکستان د ساحلي ځواکونو درې سرتېري او د پوځ یو سرتېری وژل شوي دي.

چارواکو ویلي، اته پوځیان او اته د ساحلي ځواکونو سرتيري ټپیان شوي، چې د یوه ټپي روغتیايي وضعیت ډېر نازک ښودل شوی دی.

ويل شوي، د پولیسو او نورو امنیتي ادارو ځواکونه د پېښې ځای ته رسېدلي، سیمه یې کلابنده کړې او ټپیان یې د درملنې لپاره روغتون ته لېږدولي دي.

د دغه برید مسوولیت بلوڅ وسله والې ډلې (بلوچ لبرېشن ارمي) منلی او ويلي دي، چې د عطاالله په نوم ځانمرګي یې یاد برید ترسره کړی دی.