د نتنیاهو دفتر: د عراقچي او قالیباف د احتمالي وژلو په اړه د نیویارک ټایمز راپور جعلي دی
د اسراییل د لومړي وزیر بنیامین نتنیاهو دفتر د نیویارک ټایمز هغه راپور رد کړی، چې پهکې ادعا شوې وه، چې امریکايي چارواکو د ایران د بهرنیو چارو وزیر عباس عراقچي او د ایران د پارلمان رییس محمدباقر قالیباف ته د اسراییل له لوري د دوی د احتمالي د په نښه کېدو له امله خبرداری ورکړی وو.
د نتنیاهو دفتر د جمعې په ورځ (د چنګاښ ۱۲مه) په همدې تړاو په خپره کړې اعلامیه کې ویلي، دا راپور «په بشپړ ډول جوړ شوی او له واقعیت سره په ټکر کې» دی او همداراز یې هغه «جعلي خبر» بللی دی.
نیویارک ټایمز تر دې مخکې راپور ورکړی وو، چې امریکايي چارواکو د روان میلادي کال په لومړیو کې د ایران او امریکا ترمنځ د غیرمستقیمو خبرو پر مهال عباس عراقچي او محمدباقر قالیباف ته خبرداری ورکړی وو، چې ښايي اسراییل د هغوی د وژلو هڅه وکړي.
د اسراییل د لومړي وزیر دفتر د دې راپور ټولې ادعاوې رد کړي او ټینګار یې کړی، چې د نیویارک ټایمز خپور شوی راپور له حقیقت سره سمون نهلري.
