د شانګهای همکارۍ سازمان سرمنشي د ایران د حاکمیت او ځمکنۍ بشپړتیا پر درناوي ټینګار وکړ
د شانګهای همکارۍ سازمان سرمنشي نورلان یرمکبایف د ایران له بهرنیو چارو وزیر سیدعباس عراقچي سره په لیدنه کې د ایران د حاکمیت، خپلواکۍ او ځمکنۍ بشپړتیا پر درناوي او د هېوادونو په کورنیو چارو کې پر نه لاسوهنې ټینګار وکړ.
د ایراني رسنۍ ایرنا د راپور له مخې، یرمکبایف چې تهران ته د ایران د پخواني مشر د جنازې او درناوي په مراسمو کې د ګډون لپاره تللی، د شانګهای همکارۍ سازمان د غړو هېوادونو په استازیتوب د ایران له دولت او خلکو سره خواخوږي څرګنده کړې ده.
په دې لیدنه کې د ایران د بهرنیو چارو وزیر سیدعباس عراقچي د شانګهای همکارۍ سازمان د غړو هېوادونو له ملاتړه مننه کړې او زیاته کړې یې ده، ټول هېوادونه ګډ مسوولیت لري چې د نړیوال قانون ساتنه وکړي، له یو اړخیزو اقداماتو سره مقابله وکړي او له هغو کسانو حساب وغواړي چې د ایران پر ضد د ترسره شویو بریدونو مسوول دي.
دواړو لورو همداراز د ایران او د شانګهای همکارۍ سازمان ترمنځ د همکاریو پر پراختیا خبرې کړې دي. د راپور له مخې، د شانګهای همکارۍ سازمان سرمنشي عراقچي ته د دې سازمان د بهرنیو چارو وزیرانو په راتلونکې غونډه کې د ګډون بلنه هم ورکړې ده.
