پر اوکراین د روسیې نوي بریدونه؛ په درېیو سیمو کې یې شپږ کسان ووژل
د اوکراین سیمهییز چارواکي وایي، چې د جمعې په ورځ د دغه هېواد په درېیو بېلابېلو سیمو کې د روسیې په بریدونو کې لږ تر لږه شپږ کسان وژل شوي دي. د چارواکو په وینا، په دغو بریدونو کې چې ډرون او هوایي بریدونه شامل دي، ګڼ شمېر نور هم ټپیان شوي دي.
د ډنیپروپتروفسک په سویل ختیځه سیمه کې د روسیې له ۵۰ څخه د زیاتو بریدونو له امله درې کسان وژل شوي چې دوه یې نیکوپول ښار ته نږدې ووژل شول. د ډنیپروپتروفسک والي اولکساندر هانژا په خپل ټېلېګرام کې لیکلي، چې په دغو بریدونو کې ۱۲ کسان ټپیان شوي دي.
بلخوا د زاپوریژیا والي ایوان فیدوروف ویلي، چې د زاپوریژیا ښار پر شمال ختیځ په برید کې دوه کسان وژل شوي او ۱۷ نور ټپیان شوي دي. دغه راز د روسیې سرحد ته نږدې په سومي ښار کې د روسي ځواکونو په یوه بمي برید کې یو بل اوکراینی هم وژل شوی دی.
په ورته وخت کې په پلازمېنه کېیف کې نن د ماتم ورځ وه، چېرته چې تېره ورځ د روسیې په توغندیزو او ډرون بریدونو کې لږ تر لږه ۳۰ کسان ووژل شول. رویټرز خبري اژانس ویلي، چې د جګړې د دواړو خواوو دا راپورونه په خپلواکه توګه نهشي تاییدولای.
