د خیبر پښتونخوا او بلوچستان پر لاره د یوه مساپر وړونکي بس لوېدو پېښه کې ۴۰ کسان مړه شوي
د خیبر پښتونخوا او بلوچستان ایالتونو ترمنځ د دانه سر په سیمه کې یو مساپر وړونکی بس ژورې کندې ته لوېدلی، چې له امله یې لږترلږه ۴۰ کسان مړه او ۸ نور ټپیان شوي دي. د شیراني ولسوالۍ مرستیال کمېشنر حضرت علي کاکړ افغانستان انټرنشنل پښتو ته ویلي، په دغه بس کې ټولټال ۴۸ مساپر سپاره وو.
د نوموړي په وینا؛ د یادې ولسوالۍ ادارې، سرحدي ځواکونو او د طبي بېړني غبرګون مرکز ژغورونکې ډلې د پېښې ځای ته رسېدلي او د ژغورنې او مرستې عملیات یې پیل کړي دي. د پېښې د رامنځته کېدو لامل لاتراوسه روښانه نهدی. ځایي چارواکي وایي، د پېښې په اړه یې پلټنې روانې دي.
