د سعودي عربستان په مشرۍ ایتلاف حوثیانو ته د «بېساري» ځواب خبرداری ورکړ
په یمن کې د سعودي عربستان په مشرۍ پوځي ایتلاف ویلي، که په دغه هېواد د برید هر ډول هڅه وشي، نو په پرېکنده او بېساري ځواک به ورته ځواب ورکړل شي.
دا خبرداری څو ساعته وروسته له هغه ورکړل شو چې د ایران په ملاتړ حوثیانو ګواښ وکړ، که سعودي عربستان د دوی په وینا د یمن د هوايي حریم «سرغړونې» ته دوام ورکړي، نو د سعودي هوايي ډګرونه او مهمې ګټې به په وچه او سمندر کې په نښه کړي.
دا کړکېچ داسې مهال زیات شوی چې د یمن حکومت هم په وروستیو ورځو کې ایران د صنعا ښار ته د مستقیمو الوتنو په ترسره کولو سره د یمن د ملي حاکمیت په نقض تورن کړی او حوثیان یې «د ایران د پروژې پورې تړلې ډله» بللې ده.
