په خوست کې د طالبانو د والي ویاند وايي، چې له څه مودې ځنډ وروسته د متحده عربي امارات له دوبۍ څخه د خوست نړیوال هوایي ډګر ته د کاماېر هوایي شرکت الوتنې بیا پیل شوې. نوموړی د دغه ځنډ لامل تخنیکي ستونزې یادوي.
د خوست ولایت لپاره د طالبانو ویاند مستغفر ګربز د شنبې په ورځ (د چنګاښ ۱۳مه) د یوې خبرپاڼې په خپرولو سره ویلي، د یاد شرکت لومړۍ الوتکه نن په خوست نړیوال هوایي ډګر کې ناسته وکړه.
مستغفر ګربز زیاته کړې، چې د دغو الوتنو په بیا پیل سره به کاماېر هوایي شرکت په اونۍ کې دوه منظمې الوتنې د خوست او دوبۍ ترمنځ ترسره کړي. د هغه په وینا، د دغه منظم هوایي تګ راتګ په پیلېدو سره به د مسافرو لپاره ګڼې اسانتیاوې رامنځته شي.
د طالبانو دغه ولایتي ویاند د الوتنو د ځنډېدو لامل تخنیکي ستونزې یادې کړي او په وینا یې، چې اوس دغه تخنیکي ستونزې هوارې شوي او وضعیت عادي حالت ته راګرځېدلی دی.
د خوست نړیوال هوایي ډګر د هېواد په کچه یو له هغو ډګرونو دی چې د مسافرو د تګ راتګ لپاره کارول کېږي او د دوبۍ او خوست ترمنځ د الوتنو بیا پیل د هغو مسافرو لپاره خورا مهم بلل کېږي چې په متحده عربي امارات کې ژوند او کار کوي او غواړي په اسانۍ سره خپل ټاټوبي ته تګ راتګ وکړي.
