افغان فټبالره: د ۲۰۲۶ نړیوال جام ګټه باید نجونو او کډوالو ته هم ورسېږي
د افغانستان د ښځو د فوټبال ملي لوبډلې پخوانۍ لوبډلمشرې خالده پوپل، ویلي چې د ۲۰۲۶ کال د فوټبال نړیوال جام کوربه هېوادونه باید ډاډ ترلاسه کړي چې د سیالیو ګټې یوازې تر لوبغالو محدودې نه وي، بلکې نجونو، کډوالو او زیانمنو ټولنو ته هم ورسېږي.
پوپل، چې له ۲۰۲۱ کال کې د طالبانو له بیا واکمنېدو وروسته له افغانستانه وتلې، د رویټرز خبري اژانس ته ویلي چې اوس په مکسیکو ښار کې له سیمهییزو بنسټونو سره د کډوالو ماشومانو او محرومو ټولنو لپاره د فوټبال روزنیز پروګرامونه پرمخ وړي.
هغې ویلي، نړیوال جام لنډمهاله سیالۍ دي، خو مهمه دا ده چې له دغو سیالیو وروسته ټولنې دوامداره ملاتړ ترلاسه کړي.
پوپل د مکسیکو د ښځو په فوټبال کې د وروستیو پرمختګونو هرکلی کړی او ویلي یې دي چې د ښځینه ریفریانو او لوبغاړو زیات حضور نجونې هڅوي چې فوټبال ته مخه کړي.
هغې دا هم ویلي چې فوټبال له ټولنیزو او سیاسي مسایلو بېل نه دی او د ښځو فوټبال د ښځو د حقونو له مبارزو سره تړاو لري.
د افغانستان د وضعیت په اړه پوپل ویلي، له ۲۰۲۱ کال راهیسې ښځې له زدهکړو، کار، ورزش او عامه ژوند څخه محرومې شوې دي. هغې افغانستان د ښځو لپاره «پرانیستی زندان» بللی او ویلي یې دي چې په جلاوطنۍ کې د افغانستان د ښځو د فوټبال لوبډله د ښځو د حقونو د ساتنې سمبول دی.
پوپل د ښځو د فوټبال د سوداګریز کېدو په اړه هم اندېښنه ښودلې او ویلي یې دي چې د پانګونې له زیاتېدو سره د لوبغاړو خپلواک غږ کمزوری کېږي
