د افغانستان د شپږیزه کرېکټ لیګ په دوام، د خوست ولایت رحمت ولي مسرور کرکټ لوبغالی نن د دوو مهمو سیالیو کوربه توب کوي، چې پکې سپین غر پړانګان د بست ساتونکو او امو نهنګان د مس عینک اتلانو پر وړاندې د سیالۍ ډګر ته ښکته کېږي.
د افغانستان کرېکټ بورډ د معلوماتو له مخې، د شپږیزه کرکټ لیګ په لړ کې نن په خوست ولایت کې دوه سترې سیالۍ ترسره کېږي.
په لومړۍ لوبه کې د سپین غر پړانګانو او بست ساتونکو لوبډلې سره مخامخ کېږي، چې د لوبې پچه بست ساتونکو وګټله او لومړی یې د توپ اچونې پرېکړه وکړه.
د ورځې په دویمه سیالۍ کې به امو نهنګان لوبډله د مس عینک اتلانو پر وړاندې د بریا لپاره میدان ته ښکته شي.
د کرېکټ بورډ چارواکي وایي چې تېره ورځ د دغو سیالیو ننداره د مینهوالو له پراخ ګډون سره ترسره شوه او نږدې پنځلس زره نندارچیان لوبغالي ته ورغلي وو.
چارواکو زیاته کړې چې د ټکټونو د ډېرې غوښتنې له امله یو شمېر نندارچیان ونه توانېدل چې لوبغالي ته دننه شي، او د ګڼې ګوڼې له امله ځینو ته د ټکټونو پیسې هم بېرته ورکړل شوې دي.
د کرېکټ بورډ چارواکو ددغه سیالیو لیدلو لپاره هم خلکو ته بلنه ورکړې چې که نږدې وي، نو د رحمت ولي مسرور کرکټ لوبغالي ته ورشي او دغه په زړه پورې سیالۍ له نږدې وګوري.
